ಶ್ರೀ ಶ್ರೀ ಶ್ರೀ ಜಗದ್ಗುರು ಖಾದಿರ್ಲಿಂಗಾ ಸಾಹೇಬ್ 322ನೇ ಉರುಸ್–ಮುಬಾರಕ್: ಭಕ್ತರಿಗೆ ಆಧ್ಯಾತ್ಮಿಕ ಶ್ರೇಯಸ್ಸಿನ ಸುವರ್ಣಾವಕಾಶ – ಹಿರಿಯ ವಕೀಲ ಶರತ್ ದಂಡಿನ್ಕೌತಾಳಂ (ಆಂಧ್ರಪ್ರದೇಶ)
ಗಂಗಾವತಿ, ಏ.28:ಆಂಧ್ರಪ್ರದೇಶದ ಕರ್ನೂಲ್ ಜಿಲ್ಲೆಯ ಅದೋನಿ ತಾಲ್ಲೂಕಿನ ಕೌತಾಳಂನಲ್ಲಿರುವ ಶ್ರೀ ಶ್ರೀ ಶ್ರೀ ಜಗದ್ಗುರು ಖಾದಿರ್ಲಿಂಗಾ ಸಾಹೇಬ್ ದರ್ಗಾಶರೀಫ್ನಲ್ಲಿ ನಡೆಯಲಿರುವ 322ನೇ ಉರುಸ್–ಮುಬಾರಕ್ ಮಹೋತ್ಸವವು ಭಕ್ತರಲ್ಲಿ ಅಪಾರ ಆಧ್ಯಾತ್ಮಿಕ ಚೈತನ್ಯ ಮೂಡಿಸುವ ಪವಿತ್ರ ಸಂದರ್ಭವಾಗಿದೆ ಎಂದು ಹಿರಿಯ ವಕೀಲ ಶರತ್ ದಂಡಿನ್ ತಿಳಿಸಿದ್ದಾರೆ.ಏಪ್ರಿಲ್ 29ರಿಂದ ಮೇ 2ರವರೆಗೆ ನಡೆಯಲಿರುವ ಈ ಮಹೋತ್ಸವವು ಸಂಪ್ರದಾಯಬದ್ಧ ಧಾರ್ಮಿಕ ವಿಧಿವಿಧಾನಗಳೊಂದಿಗೆ ಭಕ್ತಿಭಾವದಿಂದ ಜರುಗಲಿದ್ದು, ವಿವಿಧ ರಾಜ್ಯಗಳಿಂದ ಸಾವಿರಾರು ಭಕ್ತರು ಭಾಗವಹಿಸುವ ನಿರೀಕ್ಷೆಯಿದೆ. ಕಾರ್ಯಕ್ರಮದ ಅಂಗವಾಗಿಸಂಧಲ್ (ಗಂಥ್) – ಏಪ್ರಿಲ್ 29 (ಬುಧವಾರ)ಉರುಸ್ ಮುಬಾರಕ್ – ಏಪ್ರಿಲ್ 30 (ಗುರುವಾರ)ಸಫ್ರಾ ಷರೀಫ್ – ಮೇ 1 (ಶುಕ್ರವಾರ)ಜಿಯಾರತ್ ಮುಬಾರಕ್ – ಮೇ 2 (ಶನಿವಾರ)ಎಂಬಂತೆ ವಿಶೇಷ ಆಚರಣೆಗಳು ನಡೆಯಲಿವೆ.ಈ ಮಹೋತ್ಸವದ ಆಧ್ಯಾತ್ಮಿಕ ಮಹತ್ವವನ್ನು ವಿವರಿಸಿದ ಶರತ್ ದಂಡಿನ್ ಅವರು, “ಜಗದ್ಗುರು ಖಾದಿರ್ಲಿಂಗಾ ಸಾಹೇಬ್ ಅವರ ಜೀವನ ಸಂದೇಶವು ಮಾನವೀಯತೆ, ಶಾಂತಿ ಮತ್ತು ಸಹೋದರತ್ವವನ್ನು ಪ್ರತಿಪಾದಿಸುತ್ತದೆ. ದರ್ಗಾಕ್ಕೆ ಭೇಟಿ ನೀಡುವ ಭಕ್ತರಿಗೆ ಆತ್ಮಶಾಂತಿ, ಮನೋಬಲ ಹಾಗೂ ಜೀವನದಲ್ಲಿ ಸದ್ಗುಣಗಳ ಬೆಳವಣಿಗೆ ದೊರೆಯುತ್ತದೆ” ಎಂದು ಹೇಳಿದರು.ಉರುಸ್ ಸಂದರ್ಭದಲ್ಲಿ ನಡೆಯುವ ಜಿಯಾರತ್, ಪ್ರಾರ್ಥನೆಗಳು ಹಾಗೂ ಧಾರ್ಮಿಕ ಉಪನ್ಯಾಸಗಳು ಭಕ್ತರ ಮನಸ್ಸನ್ನು ಶುದ್ಧಗೊಳಿಸಿ ಸಂಕಷ್ಟಗಳಿಂದ ಮುಕ್ತಿ ನೀಡುವ ದೈವಿಕ ಅನುಭವವಾಗುತ್ತವೆ. ಸಮಾಜದಲ್ಲಿ ಸೌಹಾರ್ದತೆ ಮತ್ತು ಏಕತೆ ಬೆಳೆಸುವಲ್ಲಿ ಇಂತಹ ಮಹೋತ್ಸವಗಳು ಪ್ರಮುಖ ಪಾತ್ರವಹಿಸುತ್ತವೆ ಎಂದು ಅವರು ಅಭಿಪ್ರಾಯಪಟ್ಟರು.ಈ ಉರುಸ್ ಮಹೋತ್ಸವದ ನಿರ್ವಹಣೆಯನ್ನು ಜಗದ್ಗುರುಗಳ ವಂಶಸ್ಥರಾದ ಸಜ್ಜಾದಾ, ಗದ್ದೀ ನಶೀನ್ ಹಾಗೂ ಧರ್ಮಕರ್ತೃಗಳು ಸಮರ್ಪಕವಾಗಿ ಕೈಗೊಂಡಿದ್ದು, ಭಕ್ತರಿಗೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ಕರ್ನಾಟಕದ ಬಳ್ಳಾರಿ ಜಿಲ್ಲೆಯ ಕುರುಗೋಡು ಸೇರಿದಂತೆ ವಿವಿಧ ದರ್ಗಾಗಳಿಂದಲೂ ಭಕ್ತರು ಭಾಗವಹಿಸಲಿದ್ದಾರೆ.“ಉರುಸ್ ಮಹೋತ್ಸವದಲ್ಲಿ ಭಾಗವಹಿಸುವುದು ಭಕ್ತರಿಗೆ ಆಧ್ಯಾತ್ಮಿಕ ಉನ್ನತಿಗೆ ದಾರಿ ತೆರೆದಿಡುತ್ತದೆ. ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಶ್ರೀಗಳ ಆಶೀರ್ವಾದ ಪಡೆಯಬೇಕು” ಎಂದು ಶರತ್ ದಂಡಿನ್ ಮನವಿ ಮಾಡಿದ್ದಾರೆ.ಸಕಲ ಭಕ್ತಾದಿಗಳು ಉರುಸ್ ಕಾರ್ಯಕ್ರಮಗಳಲ್ಲಿ ಭಕ್ತಿ–ಶ್ರದ್ಧೆಯಿಂದ ಪಾಲ್ಗೊಂಡು ಜಗದ್ಗುರು ಖಾದಿರ್ಲಿಂಗಾ ಸಾಹೇಬ್ ಅವರ ಕೃಪೆಗೆ ಪಾತ್ರರಾಗಬೇಕೆಂದು ಆಯೋಜಕರು ವಿನಂತಿಸಿದ್ದಾರೆ.
