ಮೂಲಸೌಕರ್ಯವಿಲ್ಲದೇ 25 ಲಕ್ಷ ಹರಾಜು? ಅಂಜನಾದ್ರಿಯಲ್ಲಿ ಟೆಂಡರ್ ವಿಫಲ — ಆಡಳಿತದ ಗಮನಕ್ಕೆ ಗಂಭೀರ ಪ್ರಶ್ನೆಗಳು…
ವರದಿ:- ಜೋಗಿನ್ ರಮೇಶ್ ನಾಯಕ.
ಗಂಗಾವತಿ, ಏಪ್ರಿಲ್ 28: ಗಂಗಾವತಿ ತಾಲೂಕಿನ ಕಿಷ್ಕಿಂಧಾ ಅಂಜನಾದ್ರಿ ಧಾರ್ಮಿಕ ಕೇಂದ್ರದಲ್ಲಿ ಪಾರ್ಕಿಂಗ್ ಹರಾಜು ಪ್ರಕ್ರಿಯೆ ಸಂಪೂರ್ಣವಾಗಿ ವಿಫಲಗೊಂಡಿದ್ದು, ಆಡಳಿತದ ಯೋಜನಾ ಕೊರತೆ ಮತ್ತು ನೆಲಮಟ್ಟದ ವಾಸ್ತವ ಪರಿಸ್ಥಿತಿಗಳ ನಡುವಿನ ಭಾರೀ ವ್ಯತ್ಯಾಸವನ್ನು ಬಹಿರಂಗಪಡಿಸಿದೆ.ಲಕ್ಷಾಂತರ ರೂಪಾಯಿ ಆದಾಯದ ನಿರೀಕ್ಷೆಯೊಂದಿಗೆ ಸರ್ಕಾರ ಹರಾಜು ಪ್ರಕ್ರಿಯೆ ಕೈಗೊಂಡಿದ್ದರೂ, ಸ್ಥಳದಲ್ಲಿನ ಮೂಲಸೌಕರ್ಯಗಳ ಕೊರತೆ ಬಿಡ್ದಾರರನ್ನು ಹಿಂದೆ ಸರಿಯುವಂತೆ ಮಾಡಿದೆ. ಎರಡು ಎಕರೆ 14 ಗುಂಟೆ ಜಾಗವಿದೆ ಎಂದು ದಾಖಲೆಗಳಲ್ಲಿ ಉಲ್ಲೇಖಿಸಿದ್ದರೂ, ವಾಸ್ತವದಲ್ಲಿ ಆ ಜಾಗದಲ್ಲಿ ನಾಲೆ, ಶೌಚಾಲಯ, ಕಟ್ಟಡಗಳು ಮತ್ತು ಇತರೆ ವ್ಯವಸ್ಥೆಗಳು ಇರುವುದರಿಂದ ವಾಹನ ನಿಲುಗಡೆಗೆ ಅಗತ್ಯವಾದ ಸ್ಥಳ ಲಭ್ಯವಿಲ್ಲ ಎಂಬುದು ಬಿಡ್ದಾರರ ಆಕ್ಷೇಪವಾಗಿದೆ.ಹರಾಜು ಷರತ್ತುಗಳಲ್ಲಿ ಮುಂಗಡ ಠೇವಣಿ, ಕಠಿಣ ನಿಯಮಗಳು, ದಂಡ ವಿಧಿಗಳು, ಸಮಯ ಮಿತಿಗಳು ಸ್ಪಷ್ಟವಾಗಿ ಉಲ್ಲೇಖಗೊಂಡಿದ್ದರೂ, ಪಾರ್ಕಿಂಗ್, ಕುಡಿಯುವ ನೀರು ಮತ್ತು ಶೌಚಾಲಯಗಳಂತಹ ಮೂಲಸೌಕರ್ಯಗಳ ಕೊರತೆ ಪ್ರಮುಖ ಸಮಸ್ಯೆಯಾಗಿ ಪರಿಣಮಿಸಿದೆ.ಏಪ್ರಿಲ್ 27ರಂದು ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಕೇವಲ ಐದು ಮಂದಿ ಮಾತ್ರ ಭಾಗವಹಿಸಿದ್ದು, ಸ್ಥಳ ಪರಿಶೀಲನೆಯ ಬಳಿಕ ಅವರು ಕೂಡ ಟೆಂಡರ್ನಿಂದ ಹಿಂದೆ ಸರಿದಿದ್ದಾರೆ. ಪರಿಣಾಮವಾಗಿ ಹರಾಜು ಪ್ರಕ್ರಿಯೆ ರದ್ದುಗೊಂಡಿದೆ.ಸರ್ಕಾರವು 25 ಲಕ್ಷಕ್ಕೂ ಅಧಿಕ ಮೊತ್ತದ ಟೆಂಡರ್ ನಿರೀಕ್ಷೆ ಇಟ್ಟಿದ್ದರೂ, ದ್ವಿಚಕ್ರ ವಾಹನಕ್ಕೆ ₹5, ತ್ರಿಚಕ್ರಕ್ಕೆ ₹20 ಹಾಗೂ ಕಾರು-ಬಸ್ಸಿಗೆ ₹30 ನಿಗದಿಪಡಿಸಿದ ಶುಲ್ಕದಲ್ಲಿ ಲಾಭ ಸಾಧಿಸುವುದು ಅಸಾಧ್ಯ ಎಂಬುದು ಬಿಡ್ದಾರರ ಅಭಿಪ್ರಾಯವಾಗಿದೆ. ಸ್ಥಳಾವಕಾಶ ಕೊರತೆಯಿಂದ ವಾಹನಗಳ ನಿರ್ವಹಣೆಯೂ ಕಷ್ಟಕರವಾಗಿದೆ.ಇನ್ನೂ, ವರ್ಷದಲ್ಲಿ ಮೂರುದಿಂದ ನಾಲ್ಕು ತಿಂಗಳು ಪ್ರವಾಸಿಗರ ಸಂಖ್ಯೆ ಕಡಿಮೆ ಇರುತ್ತದೆ. ಹನುಮ ಮಾಲಧಾರಿಗಳು ಆಗಮಿಸುವ ದಿನಗಳಲ್ಲಿ ಮೂರು ದಿನಗಳ ಕಾಲ ಪಾರ್ಕಿಂಗ್ ಶುಲ್ಕ ವಸೂಲಿಗೂ ಅವಕಾಶ ಇರುವುದಿಲ್ಲ. ಈ ಹಿನ್ನೆಲೆ ವರ್ಷಪೂರ್ತಿ ಆದಾಯ ಸ್ಥಿರವಾಗಿರದೆ, ಟೆಂಡರ್ದಾರರು ಆರ್ಥಿಕ ನಷ್ಟ ಅನುಭವಿಸುವ ಸಾಧ್ಯತೆ ಇದೆ.ಪಾರ್ಕಿಂಗ್ ನಿರ್ವಹಣೆಯಲ್ಲಿ ತೊಡಗಿರುವ ಕಾರ್ಮಿಕರಿಗೆ ಊಟ, ವಸತಿ ಸೇರಿದಂತೆ ವೆಚ್ಚಗಳನ್ನು ಕೂಡ ಟೆಂಡರ್ದಾರರೇ ಭರಿಸಬೇಕಾಗುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ಹೆಚ್ಚಿನ ಮೊತ್ತದ ಟೆಂಡರ್ ಪಡೆಯುವುದು ವ್ಯವಹಾರಿಕವಾಗಿ ಅಸಾಧ್ಯ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.ಸಾರ್ವಜನಿಕ ವಲಯದಲ್ಲಿಯೂ ಈ ವಿಚಾರ ಚರ್ಚೆಗೆ ಗ್ರಾಸವಾಗಿದೆ. ಸರ್ಕಾರಕ್ಕೆ ಆದಾಯ ಮೂಲಗಳು ಅಗತ್ಯವಿದ್ದರೂ, ಭಕ್ತರು ಮತ್ತು ಪ್ರವಾಸಿಗರಿಗೆ ಅನಾನುಕೂಲವಾಗದ ರೀತಿಯಲ್ಲಿ ಯೋಜನೆ ರೂಪಿಸುವ ಅಗತ್ಯವಿದೆ ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.** ಆಡಳಿತದ ಗಮನಕ್ಕೆ ಪ್ರಮುಖ ಅಂಶಗಳುಪಾರ್ಕಿಂಗ್ಗೆ ಸಮರ್ಪಕವಾದ ಭೂಮಿ ಮತ್ತು ಯೋಜಿತ ವ್ಯವಸ್ಥೆ ಅಗತ್ಯಶೌಚಾಲಯ ಹಾಗೂ ಕುಡಿಯುವ ನೀರಿನ ಮೂಲಸೌಕರ್ಯ ತುರ್ತು ಅಗತ್ಯಹರಾಜು ಪ್ರಕ್ರಿಯೆಗೆ ಮುನ್ನ ಸ್ಥಳ ಪರಿಶೀಲನೆ ಕಡ್ಡಾಯಗೊಳಿಸುವುದುಭೂಮಿಯ ವಿಸ್ತರಣೆ ಅಥವಾ ಪರ್ಯಾಯ ಸ್ಥಳ ಹುಡುಕುವ ಕ್ರಮಪ್ರವಾಸಿಗರಿಗೆ ಹೊರೆ ಆಗದಂತೆ ಶುಲ್ಕ ಮತ್ತು ವ್ಯವಸ್ಥೆಯ ಸಮತೋಲನ** ಅಧಿಕಾರಿಗಳ ಹೇಳಿಕೆ (ಉಪ ತಹಸೀಲ್ದಾರ್ ಮಾಂತಗೌಡ)“ಮೇಲಾಧಿಕಾರಿಗಳ ಆದೇಶದ ಮೇರೆಗೆ ಅಂಜನಾದ್ರಿ ಪಾರ್ಕಿಂಗ್ ಟೆಂಡರ್ಗೆ ಆಹ್ವಾನ ನೀಡಲಾಗಿತ್ತು. ಐದು ಮಂದಿ ಭಾಗವಹಿಸಿದ್ದರು. ಆದರೆ ಸ್ಥಳದ ಕೊರತೆ, ಕುಡಿಯುವ ನೀರು ಸೇರಿದಂತೆ ಮೂಲಸೌಕರ್ಯಗಳ ಅಭಾವದ ಕುರಿತು ಚರ್ಚೆ ನಡೆದ ಹಿನ್ನೆಲೆಯಲ್ಲಿ ಟೆಂಡರ್ದಾರರು ಮುಂದುವರಿಯಲಿಲ್ಲ.ಈ ಕಾರಣದಿಂದ ಟೆಂಡರ್ ರದ್ದುಗೊಂಡಿದ್ದು, ಮೇಲಾಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ. ಮುಂದಿನ 15 ದಿನಗಳಲ್ಲಿ ಸ್ಥಳದ ಸರ್ವೆ ನಡೆಸಿ, ಅಗತ್ಯ ವ್ಯವಸ್ಥೆಗಳ ಕುರಿತು ವರದಿ ಸಲ್ಲಿಸಲಾಗುವುದು,” ಎಂದು ಉಪ ತಹಸೀಲ್ದಾರ್ ಮಾಂತಗೌಡ ತಿಳಿಸಿದ್ದಾರೆ.
