ಗಂಗಾವತಿಯಲ್ಲಿ 108 ಸುಮಂಗಲೆಯರಿಂದ ಬನಶಂಕರಿ ದೇವಿ ಕುಂಭೋತ್ಸವ ಸಂಪನ್ನ

ಗಂಗಾವತಿಯಲ್ಲಿ 108 ಸುಮಂಗಲೆಯರಿಂದ ಬನಶಂಕರಿ ದೇವಿ ಕುಂಭೋತ್ಸವ ಸಂಪನ್ನ

ಗಂಗಾವತಿ, ಸೆ. 4: ನಗರದ ಬಸವಣ್ಣ ಸರ್ಕಲ್ ನಲ್ಲಿರುವ ಪುರಾತನ ಶ್ರೀ ಬನಶಂಕರಿ ದೇವಿ ದೇವಸ್ಥಾನದಲ್ಲಿ ದೇವಾಂಗ ಸಮಾಜ ಕ್ಷೇಮಾಭಿವೃದ್ಧಿ ಸಂಘ, ದೇವಾಂಗ ಯುವಕ ಸಂಘ ಹಾಗೂ ಬನಶಂಕರಿ ಮಹಿಳಾ ಸಂಘದ ಸಹಯೋಗದಲ್ಲಿ ಶ್ರೀ ಬನಶಂಕರಿ ದೇವಿ ಕುಂಭೋತ್ಸವ ಹಾಗೂ ಮಹಾ ಅಭಿಷೇಕ ಕಾರ್ಯಕ್ರಮವು ಶ್ರದ್ಧಾ-ಭಕ್ತಿಯಿಂದ ಜರುಗಿತು.

ದೇವಾಂಗ ಸಮಾಜದ ಅಧ್ಯಕ್ಷರು ಹಾಗೂ ಮಾಜಿ ನಗರಸಭಾ ಅಧ್ಯಕ್ಷರಾದ ಶ್ರೀ ವಾಸುದೇವ್ ಕೊಳಗದ ಅವರ ಮುಖಂಡತ್ವದಲ್ಲಿ ಹಾಗೂ ದೇವಾಂಗಮಠದ ಶ್ರೀ ಶಂಕರಯ್ಯ ಸ್ವಾಮಿ ಅವರ ನೇತೃತ್ವದಲ್ಲಿ ಧಾರ್ಮಿಕ ವಿಧಿ-ವಿಧಾನಗಳೊಂದಿಗೆ ಕುಂಭೋತ್ಸವ ನೆರವೇರಿತು.

ದೇವಾಂಗ ಮಠದಿಂದ ಬಸವಣ್ಣ ಸರ್ಕಲ್ ನಲ್ಲಿರುವ ದೇವಸ್ಥಾನದವರೆಗೆ 108 ಸುಮಂಗಲೆಯರು ಪೂರ್ಣ ಕುಂಭಗಳನ್ನು ಹೊತ್ತು ಭಕ್ತಿ ಪೂರ್ವಕ ಮೆರವಣಿಗೆಯಲ್ಲಿ ಸಾಗಿದರು. ಸಾಂಪ್ರದಾಯಿಕ ವಾದ್ಯ ಘೋಷದೊಂದಿಗೆ ನಡೆದ ಈ ಕುಂಭೋತ್ಸವ ಭಕ್ತರಲ್ಲಿ ಭಕ್ತಿ ಭಾವ ಮೂಡಿಸಿತು.

ನಂತರ ಶ್ರೀ ಬನಶಂಕರಿ ದೇವಿಗೆ ಮಹಾ ಅಭಿಷೇಕ ಹಾಗೂ ವಿಶೇಷ ಪೂಜೆ ನೆರವೇರಿಸಿ, ಲೋಕಕಲ್ಯಾಣ, ಸಮಾಜದ ಸುಖ-ಶಾಂತಿ, ಸಮೃದ್ಧಿ ಹಾಗೂ ಸರ್ವರ ಒಳಿತಿಗಾಗಿ ಪ್ರಾರ್ಥನೆ ಸಲ್ಲಿಸಲಾಯಿತು.

ಈ ಕಾರ್ಯಕ್ರಮದಲ್ಲಿ ಸಂಘಟನಾ ಕಾರ್ಯದರ್ಶಿ ನೀಲಕಂಠಪ್ಪ ನಾಗಶೆಟ್ಟಿ, ಮಲ್ಲಿಕಾರ್ಜುನ್ ತೂನಾ, ಪ್ರಹ್ಲಾದ್ ಪರಿಗಿ, ಮಲ್ಲೇಶಪ್ಪ ಕೊಂಡುಕೊಂದಿ, ಬನಶಂಕರಿ ಮಹಿಳಾ ಸಂಘದ ಅಧ್ಯಕ್ಷೆ ಶ್ರೀಮತಿ ಪ್ರೇಮ ಕೊಳಗದ್, ವಾಣಿಶ್ರೀ ಕರಡಕಲ್, ಅಶ್ವಿನಿ ಕೊಳಗದ್, ಲೀಲಾವತಿ ನಾಗಶೆಟ್ಟಿ, ತ್ರಿವೇಣಿ ಸಂಕದ್, ಮೀನಾಕ್ಷಮ್ಮ ಕಿರಗಿ ಸೇರಿದಂತೆ ಸಮಾಜದ ಹಿರಿಯರು, ಯುವಕರು ಹಾಗೂ ಅಪಾರ ಭಕ್ತರು ಉಪಸ್ಥಿತರಿದ್ದರು.

ಗಂಗಾವತಿಯ ಪುರಾತನ ಬನಶಂಕರಿ ದೇವಿ ದೇವಸ್ಥಾನದಲ್ಲಿ ನಡೆದ ಈ ಕುಂಭೋತ್ಸವವು ದೇವಾಂಗ ಸಮಾಜದ ಧಾರ್ಮಿಕ ಪರಂಪರೆ, ಮಹಿಳೆಯರ ಸಕ್ರಿಯ ಪಾಲ್ಗೊಳ್ಳುವಿಕೆ ಹಾಗೂ ಸಮಾಜದ ಒಗ್ಗಟ್ಟಿಗೆ ಸಾಕ್ಷಿಯಾಯಿತು.

Gangavathi #BanashankariTemple #Kumbhotsava #DevangaSamaja #KoppalNews #GangavathiNews